Kambi maalum ya uchunguzi na matibabu ya moyo yafanyika Iringa

Na: Genofeva Matemu – Iringa

03/04/2023 Wananchi wa Mkoa wa Iringa wametakiwa kutumie fursa ya uwepo

wa madaktari bingwa wa moyo kujitokeza kwa wingi kuchunguza moyo kupitia

kambi maalum inayofanywa na madaktari wa Taasisi ya Moyo Jakaya Kikwete

(JKCI).

Rai hiyo imetolewa leo na Mganga Mfawidhi Hospitali ya Rufaa ya Mkoa wa Iringa

(IRRH) Dkt. Alfred Mwakalebela wakati wa ufunguzi wa kambi hiyo inayofanyika

kwa siku tano lengo likiwa ni kufikisha huduma karibu kwa wananchi.

Dkt. Mwakalebela alisema kupitia kambi hiyo wananchi watapata fursa ya

kupimwa vipimo vyote vikubwa vya moyo, kupata dawa kwa wale watakaokutwa

na magonjwa ya moyo na wengine watakaohitaji uchunguzi zaidi watapewa rufaa

kwa ajili ya uchunguzi zaidi katika Taasisi ya Moyo Jakaya Kikwete (JKCI)

“Tukipata wataalamu kama hawa katika Hospitali yetu kunasaidia kuwachunguza

kwa kina zaidi wagonjwa na baada ya hapo wataalam hawa watatuachia

wagonjwa hao kwa ajili ya kuendelea na kliniki hapa kwetu hivyo kupunguza tatizo

kwa kiasi kikubwa tofauti na ilivyokuwa awali”, alisema Mwakalebela.

Dkt. Mwakalebela alisema kupitia wataalam waliotoka JKCI wanaenda

kuwaonyesha njia wataalam wa IRRH ya namna ya kuwachunguza wagonjwa wa

moyo pamoja na kuwafuatilia mara kwa mara ili kwapamoja waweze kuwafuatilia

kwa karibu na kuwapa huduma stahiki.

“JKCI imekuwa na utaratibu wa kupeleka huduma karibu na wananchi ili waweze

kupata huduma kwa urahisi zaidi na sasa ni zamu yetu wananchi wa Mkoa wa

Iringa, tunaahidi kushirikiana nao kuwasaidia wananchi wetu”, alisema

Mwakalebela.

Kwa upande wake Daktari wa Taasisi ya Moyo Jakaya Kikwete (JKCI) Pedro

Pallagyo alisema magonjwa yasiyo ya kuambukiza ndio yanayoongoza kwa

kusababisha vifo vingi ulimwenguni na katika mazingira ya Tanzania magonjwa

hayo yanaonekana yakiongezeka kwa kasi.

“Wataalam wa JKCI tupo Iringa kwa ajili ya kufanya vipimo na huduma za kibingwa

za moyo hivyo tukiwa na utaratibu wa kuchunguza afya zetu na kugundua

mapema inakuwa rahisi kutibu na kuwa na matokeo mazuri zaidi”, alisema Dkt.

Pedro.

Dkt. Pedro alisema mwamko wa wananchi kuchunguza afya zao bado uko chini

lakini kupita kambi maalum za matibabu ya moyo wanazofanya toka wameanza

mwitikio umekuwa ukiongezeka huku lengo likiwa kuwasaidia wagonjwa na

kujenga desturi kwa watu kuwa wanachunguza afya zao mara kwa mara.

Naye mwananchi aliyepatiwa huduma katika kambi hiyo Gerald Isambo alisema

amekuwa akisumbuliwa na tatizo la kifua mara kwa mara na kutokupata utatuzi

nini kinachomsumbua hivyo kupitia kambi hiyo amepata fursa ya kupima moyo

wake.

Isambo alisema kuwa hakuwahi kupima moyo tangu kuzaliwa kwake hivyo fursa

hiyo aliyoipata imempa mwamko wa kufanya uchunguzi wa afya yake mara kwa

mara na kuacha tabia ya kuchuguza afya yake pale tu anapoumwa.

“Naomba kupitia Hospitali yetu ya Rufaa ya Mkoa wa Iringa huduma kama hizi na

nyingine za kibingwa ziendelee kutolewa mara kwa mara kutupa nafasi sisi

wananchi ambao hatuwezi kuzifuata mahali zilipo kuchunguza afya zetu na kuwa

na desturi ya kujichunguza”, alisema Isambo.Afisa Uuguzi wa Taasisi ya Moyo Jakaya Kikwete (JKCI) Elizabeth Meli akimpima shinikizo la damu mwilini (BP) raia wa Switzerland Lans Sottwals aliyefika katika Hospitali ya Rufaa ya Mkoa wa Iringa (IRRH) leo kwa ajili ya kupata huduma ya uchunguzi na matibabu ya moyo wakati wa kambi maalum ya sikun tano inayofanywa na wataalam hao kwa kushirikiana na wenzao wa IRRH.

Mtafiti wa Taasisi ya Moyo Jakaya Kikwete (JKCI) Loveness Mfanga akimfanyia utafiti mwananchi aliyefika katika Hospitali ya Rufaa ya Mkoa wa Iringa (IRRH) kwa ajili ya kupata huduma ya uchunguzi na matibabu ya moyo leo wakati wa kambi maalum ya matibabu ya moyo inayoendelea katika Hospitali hiyo. Kambi hiyo ya siku tano inafanywa na madaktari wa JKCI kwa kushirikiana na

wenzao wa IRRH.

Daktari wa Taasisi ya Moyo Jakaya Kikwete (JKCI) Janeth Mmari akimwelezea mwananchi wa Iringa Imelda Harrison namna ya kujikinga na magonjwa ya moyo alipofika katika Hospitali ya Rufaa ya Mkoa wa Iringa (IRRH) kwa ajili ya kupata huduma za uchunguzi na matibabu ya moyo leo katika kambimmaalum ya matibabu ya moyo ya siku tano inayofanywa na madaktari wa JKCI kwa kushirikiana na wenzao wa IRRH.

Daktari bingwa wa magonjwa ya moyo wa Taasisi ya Moyo Jakaya Kikwete (JKCI) Mohamed Aloyce akimfanyia mgonjwa kipimo cha kuangalia jinsi moyo unavyofanya kazi (Echocardiography – ECHO) leo wakati wa kambi maalum ya matibabu ya moyo ya siku tano inayofanyika katika Hospitali ya Rufaa ya Mkoa wa Iringa (IRRH) Picha na: JKCI.