WFP WAIKABIDHI TRC MABEHEWA MATANO KUSAFIRISHIA MBOGAMBOGA

Na Said Mwishehe, Michuzi Blog

SHIRIKA la Mpango wa Chakula Duniani(WFP) imekabidhi mabehewa ya kusafirisha mazao ya mbogamboga kwa Shirika la Reli Tanzania(TRC) , lengo likiwa kuwezesha kusafirisha mazao hayo katika mazingira mazuri bila mazao kuharibika.

Kwa mujibu wa WFP mabehewa hayo ambayo wamekabidhi kwa TRC yamegharimu Sh.milioni 840 na mabehewa hayo yatatumika kusafirisha mazao hayo mikoa ya Dar es Salaam, Dodoma na Morogoro.

Akizungumza wakati wa hafla ya TRC kukabidhiwa mabehewa hayo Waziri wa Uchukuzi, Profesa Makame Mbarawa, ameishukuru WFP kwa kutatua changamoto ya kusafirisha mazao ya mbogamboga katika mikoa hiyo.

"Wakulima wa mazao hayo kama watatumia vizuri usafiri huo wa reli kutoka katika mikoa hiyo na utawaongezea ufanisi kwenye kilimo chao na kuwaongezea kipato.Pia wafanyabiashara wa matunda na mbogamboga watakuwa na uhakika bidhaa zao ziko salama.

"Nitoe maagizo kwa TRC ihakikishe usafiri kutumia mabehewa haya uwe endelevu na wenye gharama rafiki kwa wakulima, lengo ni kusaidia wakulima wetu kusafirishia bidhaa zao kuja Dar es Salaam pasipo kuharibika na kupunguza hasara mkulima," amesema

Prof.Mbarawa amesema Serikali inatambua mchango wa kilimo katika Taifa hili ndio maana imeendelea kutoa ushirikiano katika shughuli za kilimo ili kukuza pato la nchi kwa kiasi kikubwa zaidi na katika kuondoa changamoto za mazao kuharibika na gharama kubwa za usafirishaji.

Amefafanua kwa kukosa miundombinu rafiki ya kusafirisha na kuhifadhi mazao ya mbogamboga na matunda TRC ikishirikiana na WFP imekuja na mradi wa kuwasaidia wakulima kusafirisha mazao kwa njia rahisi zaidi kwa kutumia mabehewa yenye makasha yanayohifadhi ubaridi wa nyuzi joto 40.

Ameongeza Serikali kupitia Wizara ya Uchukuzi imeshirikiana na Wizara ya Kilimo, Wizara ya Mifugo na Uvuvi na Wizara ya Viwanda kuunga mkono jitihada zinazofanywa na TRC na WFP kuhakikisha upatikanaji wa masoko , miundombinu ya kuhifadhia mbogamboga na matunda pamoja na usafiri wa uhakika kwa gharama nafuu ili wakulima kunufaika na kuleta maendeleo katika nchi.

"Naomba niwahakikishie wadau wa kilimo na biashara kuwa Wizara ya Uchukuzi kupitia TRC itahakikisha wakulima na wafugaji wanapata huduma bora ya usafirishaji wa mazao yao kupitia usafiri wa reli kwa kutumia makasha haya yenye ubaridi, " amesema Waziri Mbarawa.

Kwa upande wake, Mkurugenzi na Mwakilishi mkazi wa WFP, Sarah Gordon-Gibson, amesema kupatikana mabehewa hayo kutatoa fursa kwa mikoa ya Dodoma Morogoro na Dar es Salaam wakulima wake kuwa na uhakika wa kusafirishia bidhaa zao pasipo kuogopa kuharibika njiani kabla ya kufika sokoni.

Amefafanua kuwa WFP wanajivunia kufanikisha kupatikana kwa mabehewa hayo yaliyogharimu Sh.milioni 840 na wataendelea kushirikiana na TRC na Serikali kwa ujumla kuweka mazingira mazuri kwa wakulima wa mbogamboga kutoka mikoa ya mbali na Dar es Salaam.

Sarah amesema Tanzania ni miongoni mwa wazalishaji 20 wakubwa duniani wa mazao ya bustani yanayovunwa moja kwa moja kutoka shambani .Sekta ya kilimo cha bustani inakuwa kwa kasi zaidi na inaongozwa na wakulima wadogo na inawakilisha asilimia kubwa na muhimu ya pato la Taifa linalotokana na kilimo.

Amesema pamoja na maendeleo makubwa yaliyopatikana na umuhimu wa kilimo cha bustani kwa uchumi kiasi kikubwa cha mazao hayo kinachokadiriwa kuwa kati ya asilimia 30 hadi 40 hupotea katika mnyororo wa thamani na sababu kubwa ni ukosefu wa hifadhi ya baridi.

Aidha amesema kwa kuzingatia mafanikio ya awamu ya awali WFP na wanaweza kupanua mradi hadi sehemu za ziada za reli zikiwemo Arusha, Kilimanjaro, Tanga hadi Dar es Salaam ambao unalenga kushughulikia jambo hilo la usafirishaji mazao ya bustani katika mikoa hiyo.

"WFP imekuwa ikiunganisha wakulima wadogo wadogo na masoko tangu mwaka 2009 .Mradi huu utatoa usafiri wa uhakika, salama na wa gharama nafuu kwa ajili ya mazao ya wazalishaji wadogo na wakusanyaji wa mazao kufika katika masoko."

Awali Kaimu Mkurugenzi wa TRC, Amina Lumuli, amesema anaishukuru WFP kwa kutoa mabehewa hayo na kuongeza na wao watatanua huduma hiyo na kufikia mikoa ya kanda ya ziwa na mikoa mingine yenye huduma ya usafiri wa reli na kwamba wameanza na mikoa mitatu.

"Lengo ni kusambazwa huduma hii katika mikoa yote wanayozalisha mazao ya mbogamboga na matunda.Mabehewa hayo yana uwezo wa kubeba zaidi ya tani 200 ya mazao hayo ya mboga mboga na matunda."

Wakati huo huo Mwakilishi wa wadau wa mazao hayo Ally Mbuguyo amesema kuwepo kwa mabehewa hayo ni neema kwao kama wafanyabiashara wa mazao hayo na yataeqongezea tija kwenye biashara zao.

Waziri wa Uchukuzi Profesa Makambe Mbarawa (katikati) akiwa na Mkurugenzi wa WFP Tanzania Sarah Gibson ( wa tatu kushoto) na Kaimu Mkurugenzi wa TRC ( wa nne kulia) pamoja na viongozi wengine wakiwa katika picha ya pamoja wakikata utepe kuashiria kuzinduliwa kwa mabehewa matano ya kusafirisha matunda na mbogamboga

Waziri wa Uchukuzi Makame Mbarawa akizungumza wakati wa hafla ya kuzindua mabehewa matano ambayo yatatumika kusafirisha mazao ya matunda na mbogamboga kwa kutumia usafiri wa reli.

Waziri wa Uchukuzi Makame Mbarawa akizungumza na Mkurugenzi wa WFP Tanzania Sarah Gibson kabla ya kuzinduliwa kwa mabehewa ya kusafirisha mazao ya bustani kama mbogamboga.Uzinduzi huo umefanyika jijini Dar es Sslaam.