WAZIRI WA UWEKEZAJI ALIVYOSHANGAZWA NA UWEKEZAJI MKUBWA KATIKA SEKTA YA KILIMO SONGEA

Na Albano Midelo,Songea

Waziri wa Mipango na Uwekezaji Prof.Kitila Mkumbo ameshangazwa na

uwekezaji mkubwa katika sekta ya kilimo ambapo katika Halmashauri ya

Madaba na Songea mkoani Ruvuma wawekezaji toka nje wamewekeza

katika mashamba yenye ukubwa wa hekta zaidi ya 2500.

Akiwa katika Halmashauri ya Madaba,Waziri Mkumbo alishuhudia

uwekezaji mkubwa wa Kampuni ya kigeni ya Silver Ndolela iliyowekeza

katika shamba lenye ukubwa wa hekta 1500 ambapo kampuni hiyo

inazalisha mbegu za aina nne kwa kutumia kilimo cha umwagiliaji.

Meneja wa shamba hilo alizitaja mbegu zinazozalishwa na Kampuni hiyo

kuwa ni maharagwe,mahindi,ngano na viazi ambapo Waziri Mkumbo

alisisitiza uwekezaji katika mbegu bora ni muhimu hapa nchini kwa kuwa

moja ya changamoto katika kilimo ni upatikanaji wa mbegu bora.

“Wakulima wetu wanatumia mbegu hafifu wanalima eneo kubwa na kupata

mavuno kidogo,hivyo uwepo wa shamba hili la mbegu bora itasaidia

kuboresha kilimo hapa nchini ’’,alisisitiza Waziri Mkumbo.

Waziri wa Mipango na Uwekezaji pia alikagua shamba kubwa la kilimo cha

umwagiliaji la Kampuni ya AVIV katika Kijiji cha Lipokela Halmashauri ya

Wilaya ya Songea.

Prof.Mkumbo amefurahishwa na uwekezaji mkubwa katika shamba

kahawa uliofanywa na Kampuni ya AVIV TANZANIA LTD ambapo Kampuni

hiyo inalima na kuchakata kahawa kwa mwaka tani zaidi ya 2000 katika

shamba la kahawa lenye ukubwa wa hekta zaidi ya 1000.

Waziri Mkumbo amesisitiza kuwa kulima na kuchakata kahawa ni

uwekezaji mkubwa ambao umefanywa kwa kuwezeshwa na Kituo cha

Uwekezaji nchini (TIC) ambapo amesema uwekezaji huo unashughulikia

sekta ya kilimo ambayo ni muhimu kwa maendeleo ya Taifa.

Ameipongeza Kampuni ya AVIV kwa kutekeleza mambo matatu kwa wakati

mmoja ikiwemo kilimo cha kahawa,kuchakata mazao ya kilimo hivyo kutoa

ajira kwa watanzania na kuongeza mauzo nje ya nchi.

Mwakilishi wa Mkuu wa Mkoa wa Ruvuma Mheshimiwa Kapenjama Ndile

akizungumza baada ya Waziri kutembelea maeneo ya uwekezaji katika

shamba la Madaba na Lipokela,ameutaja Mkoa wa Ruvuma kwa miaka 13

sasa unaongoza kwa uzalishaji wa mazao ya chakula nchini.

Amesema katika kutambua mchango wa Mkoa wa Ruvuma kwenye

uzalishaji chakula ,mwaka huu kwenye maadhimisho ya Nanenane Kitaifa,

Rais wa Jamhuri ya Muungano wa Tanzania Dkt.Samia Suluhu Hassan

alitoa chetu maalum kwa Mkoa wa Ruvuma kwa kushika nafasi ya kwanza

kwa uzalishaji nafaka.

Awali akitoa taarifa ya Kampuni ya AVIV, Meneja Msaidizi wa Kampuni ya

AVIV TANZANIA Muthana Namb amesema asilimia 80 ya kahawa

inayochakatwa na Kampuni hiyo inauzwa katika nchi mbalimbali Duniani

zikiwemo Marekani,Saudi Arabia,India, Japan, Jordan na Afrika ya Kusini.

Naye Mwakilishi wa Kampuni hiyo anayesimamia kilimo Johson Kishumba

amesema Kampuni ya AVIV TANZANIA imekuwa kampuni ya kwanza

katika bara la Afrika kupewa Tuzo ya Water Stewardship inayotolewa na

SGS ya nchini Afrika ya Kusini kwa kufanya vizuri kwenye kilimo na

mazingira.

Hata hivyo amesema kampuni hiyo inashirikiana na wananchi

wanaozunguka shamba hilo ambao wamekuwa wanasaidiwa katika sekta

za afya,maji na mazingira na kwamba baadhi ya wananchi wanapata ajira

kwenye shamba la kahawa.

Waziri wa Mipango na Uwekezaji alifanya ziara ya kikazi ya siku mbili

mkoani Ruvuma kwa lengo la kukutana na wawekezaji,kusikiliza mafanikio

na changamoto zao ili kuzitafutia ufumbuzi hatimaye kuimarisha zaidi eneo

la uwekezaji.

katikati ni Waziri wa Mipango na Uwekezaji Prof.Kitila Mkumbo akikagua uwekezaji uliofanywa na Kampuni ya SILVER NDOLEA katika uzaloshaji wa mbegu bora za mahindi,maharage,viazi na ngano katika shamba lenye ukubwa wa hekta 1500 katika Halmashauri ya Madaba wilayani Songea.

Waziri wa Mipango na Uwekezaji Prof.Kitila Mkumbo akizungumza baada ya kukagua uwekezaji uliofanywa na Kampuni ya AVIV TANZANIA katika sekta ya kilimo katika zao la kahawa lenye ukubwa wa hekta zaidi ya 1000 kwenye kijiji cha Lipokela Halmashauri ya wilaya ya Songea mkoani Ruvuma.

Mwakilishi wa Mkurugenzi Mkuu wa Kampuni ya AVIV TANZANIA Muthanna Namb akitoa taarifa ya utendaji kazi wa kampuni hiyo kwa Waziri wa Mipango na Uwekezaji Prof.Kitila Mkumbo alipotembelea eneo la uwekezaji.Shamba la kahawa lenye ukubwa wa hekta 1000 katika kijiji cha Lipokela wilayani Songea ambapo Kampuni ya AVIV Tanzania inalima kahawa na kuchakata zao hilo ambapo kila mwaka tani 2000 za kahawa zinachakatwa na kuuzwa nchi mbalimbali duninai.